Pangngebarang 6

6:1 Ana', le'bakko kapang a'janji untu' antanggongi inranna se'rea tau.
6:2 Siagang le'ba' tongko kapang kasikkokang ri kana-kanannu siagang nialle sikko' ri janji kalennu tonji.
6:3 Punna kammatojeng na', nia' mako lalang ri kakoasanna anjo taua. Mingka kamma anne batenu nukkulle ta'lappasa': a'lampako linta' mae ri anjo taua; pala' dudumi sollanna naero' ampata'lappasakko.
6:4 Teako a'lampai rolong tinro, siagang teako ammari-mari posoi.
6:5 Lappassangi kalennu battu ri anjo sikkoka sanrapang jangang-jangang yareka kijang ta'lappasaka battu ri tau ammuranga.
6:6 Tau malasaka parallui naparhatikang antekamma batena attallasa' kaluaraya siagang appilajara' battu ri ia.
6:7 Anjo kaluaraya tena pamimpinna, tena todong pamarentana yareka tukkajannanna,
6:8 mingka lalang wattu pakkattoang appasse'rei ke'nanga bokong untu' wattu kacipurang.
6:9 Sa'genna siapa sallona anjo tau malasaka latinro? Angngapapi nambangung?
6:10 Ammantangngi a'raka' lima untu' ammari-mari, siagang nakana, "Ah, lattinroa' sinampe' dudu, ta'do'doka'."
6:11 Mingka lalang attinrona, nitujumi ri kakurangang siagang kakasi-asiang, battua sanrapang paella' angngerang sanjata.
6:12 Tau ja'dalaka siagang tau kurangajaraka a'la'bangi a'balle-balle.
6:13 Akkarena matai siagang appareki pammatei untu' annipu.
6:14 Pikkirang botto'na rassi siagang rancana ja'dala' siagang appaumba pa'beserang ri kere-keremae.
6:15 Yangasenna anjo la'jari passabakkang nanituju kalenna ri bala ti'ring battua, nampa ancuru' taba sikali.
6:16-19 Nia' tuju passala' Nakabirisi Batara siagang tena nalaNabalang parekangi, iamintu: Sipa' borroa, bawa a'balle-balle, lima nangaia ammuno tau tena salanna, pikkirang a'rancanaya apa-apa ja'dala', bangkeng akkaro-karoa mange ri kaja'dallanga, sa'bi tulusu' a'balle-ballea, siagang tau appa'niaka passimusuang mae ri aganna.
6:20 Ana', gaukang laloi apa napassuroanga manggenu, siagang teako kaluppai sikamma pappakainga'na amma'nu.
6:21 Tuli u'rangi kana-kananna ke'nanga siagang boliki anjo ri pa'mai'nu.
6:22 Ajarang-ajaranna ke'nanga langnguluko lalang pa'jappannu, anjagaiko ri wattu bangngi, siagang assareko pitunju' ri wattu ambangunnu.
6:23 Anjo pitunju'-pitunju'na tau toanu sanrapangi lampu singaraka; pappasailena ke'nanga napicinikiangko antekamma nikanaya tallasa' baji'.
6:24 Lanri kammana nipakabella mako battu ri sikamma baine salaya, siagang battu ri panynyonyo'-panynyonyo' a'racunga battu ri bainenna tau maraenga.
6:25 Teako erokki nigoda ri kaga'ganna ke'nanga, teako takkontakki mae ri mata manynyonyo'na ke'nanga.
6:26 Anjo baine salaya akkullei nisewa sanrapang kanre sipannea anggaranna, mingka nikanaya a'gau' sala siagang bainenna tau maraenga musti nibayaraki siagang nyawa.
6:27 Maka akkullekai taua anriwa pepe' natanikanrea ri pepe' bajunna?
6:28 Maka akkullekai taua angngonjo' bara pepe' natanikanrea bangkenna ri pepe'?
6:29 Anjo sangkammai bahayana siagang assikatinroanga siagang bainenna tau maraenga. Inai-nai anggaukangi takkulleai ta'lappasa' battu ri hukkunganga.
6:30 Punna a'lukka' taua kanre, manna pole lanri cipuru'na, lanihinai.
6:31 Siagang punna nijakkalaki, musti nabayaraki ammotere' a'lappi tuju; untu' anjo musti tappela' ngasengi sikontu barang-baranna.
6:32 Mingka antekammai tu bura'ne a'gau' salaya? Ia napanraki kalenna! Ia sanna' sikali dongo'na!
6:33 Lanisessai siagang lanipare' caritai. La'jari bottoki arenna satunggu-tungguna.
6:34 Saba' lanri anjo panggaukanna nalakkimburu bura'nenna anjo bainea, sa'genna allumpa-lumpa tojeng kanassuanna. Na punna eroki a'boya pa'balassang, tena sikali nalamangngamaseang.
6:35 Takkulleai ninyonyo' siagang doe'; manna siapa jaina hadia nisareangi talakkullei ampanaungi larrona.