Yesaya 46

46:1 Iaminne kale'bakkanna rewata-rewata Babel; riolo nisombai patung Bel, siagang Nebo, mingka kamma-kamma anne nipatekeki ri olo'-olo' a'jari erangang mae ri olo'-olo' posoa.
46:2 Anjo patung-patunga takkulleai natulung paeranna, kalenna ke'nanga nilalingi a'jari tahanang. Iaminjo kale'bakkanna ke'nanga.
46:3 PilangngeriA', he turunganna Yakub, ikau ngaseng niaka tassesa ri ummakKu. Le'ba' mako Kuparakai baku' nilassukannu.
46:4 INakke tuli Allata'alanu sa'gennu toa; siagang tuli anjagaiko sa'genna kebo' uu'nu. INakke ampa'jariko siagang tuli amparakaiko, laKutulungko siagang laKupasalamakko.
46:5 Inai lanupasinrapangangA'? Niakka akkulle nipasangkammangA'?
46:6 Nasungkei taua tasna nampa natumpa bulaenna, nampa natimbang pera'na siagang batu dacing. Nagaji tukang bulaenga untu' appare' patung barhala, nampa nasomba anjo patung bate pare'na.
46:7 Anjo patunga napakui nampa naboli' ri tampa'na, ammenteng anjoreng takkullea a'lette'. Punna appala' doang taua ri ia, tappialiai, natena napasalamaki taua battu ri kasusaanna.
46:8 U'rangi siagang tangara' bajiki, he sikamma tau dorakaya!
46:9 U'rangi sikamma apa kajarianga ri jammang riolo; akuimi angkana iNakke Allata'ala, tena pantaranganna, iNakke Allata'ala, siagang tena sangkammangKu.
46:10 Battu ri pakaramulanna Kupaumi apa-apa labattua ri bokoanganna, battu riolo Kutappu memammi apa lakajarianga. Kukana: Lakajarianga apa le'baka Kutappuki, mattantu Kugaukangi erokKu!
46:11 AkkioKa' sitau tukoasa battu raya, battu rapang sikayu jangang-jangang sekke' untu' anggaukangi kaputusangKu. Apa Kupaua mattantu laKugaukangi, apa Kurancanakanga mattantu laKurupai.
46:12 PilangngeriA', he sikamma tau tampoa, ikau angkapangai angkanaya bella iji pammetanga.
46:13 LaKupa'reppeseki allo kalappassanga, talanipammonokami wattu kasalamakkang laKupassareanga. LaKupasalamaki Yerusalem, siagang Kusare Israel kalompoang."