Zakharia 2

2:1 Lalang ri paccini' ribokoangannaya, nia' kucini' sitau bura'ne anna'gala' otere' pa'baku'.
2:2 Akkuta'nanga' ri ia angkana, "Lakekomae?" Appialimi angkana, "Erokka' mange angngukkuruki Yerusalem. Eroki kuasseng angkana siapa la'buna siagang sangkara'na anjo kotaya."
2:3 Nampa kucini' anjo malaeka' le'baka a'bicara siagang inakke, a'dakka maju, siagang nia' se're malaeka' maraeng ambuntuli.
2:4 Nakana malaeka' makase'rea mae ri malaeka' makaruaya, "A'lampako linta' mange ri anjo tau rungkaya, siagang pauangi angkanaya lateai sipato' rassina kota Yerusalem napakamma tau siagang olo'-olo' niparakai, sa'genna tena olona lakkulle nibangung tembo' pakkallika ri tammulilina.
2:5 Le'baki a'janji Batara angkanaya Ia KalenNa la'jari tembo' pepe' antammulili anjo kotaya untu' alla'langngi. Siagang Ia lammantang anjoreng lalang sikontu koasa siagang kalompoanNa."
2:6-7 Nakana Batara mae ri umma'Na, "Le'bakko Kupasiara' mae ri kere-keremae. Mingka kamma-kamma anne, ikau sikamma tau nipelaka a'lampako ampilari Babel siagang ammotere' mako mange ri Yerusalem.
2:8 Inai-nai ampitabaiko lima, iami ampitabai lima ana' nikarimangngingKu." Na Nasuroma' Batara Kaminang Koasaya ampabattui anne pasanga mae ri bansa-bansa le'baka angngellaki umma'Na, angkana,
2:9 "KalenNa Batara la'jari balinnu ngaseng! Siagang laniella' ngasengko ri sikamma le'ba' ata kalennu tonji. Punna kajariang anjo passalaka, lanuassemmi angkanaya Batara Kaminang Koasaya assuroa'."
2:10 Nakana Batara, "Akkelongko ma'rannu-rannu he ikau pandudu'na Yerusalem! INakke lammantang ri tangnga-tangnganu!"
2:11 Anjo wattua jai bansa labattu mae ri Batara untu' a'jari umma'Na. Ia lammantang ri tangnga-tangnganu, siagang lanuassengi angkanaya Batara assuroa' battu mae ri kau ngaseng.
2:12 Sikalipi pole Yehuda la'jari nipatang nisa'laka untu' Batara ri butta matangkasa'Na, siagang Yerusalem la'jari kota kaminang NikarimangnginNa.
2:13 A'mereki ngaseng mako ri dallekanNa Batara! Nasaba' ammentemmi battu ri tampa' pammantanganNa ri suruga.